14 Декабрь 2019

00:00:00 (GMT+5)

Тошкент +0,6 °C

Ҳукумат
28 Июн  2019 1975
Ўзбекистон Республикаси Президентининг матбуот хизмати

Тошкент механика заводи ҳудудида яна 16 та корхона ишга туширилади

Ўзбекистон Республикаси Президенти Шавкат Мирзиёев 28 июнь куни Яшнобод туманидаги Тошкент механика заводига ташриф буюрди.

Бугунги кунда завод ҳудудида ўндан зиёд корхона фаолият юритиб, уларда икки ярим мингдан ортиқ киши меҳнат қилмоқда. Лекин бу 141 гектар майдонга эга улкан комплекс учун етарли эмас. Бундан самарали фойдаланиш мақсадида завод ҳудудида технопарк ташкил этилди. 

Давлатимиз раҳбари мазкур технопаркда амалга ошириладиган лойиҳалар тақдимоти билан танишди.

Унга кўра, бу ерда 2019-2020 йилларда умумий қиймати 385 миллион доллардан зиёд бўлган 16 та корхонани ишга тушириш режалаштирилган. Бу корхоналарда йилига 1 миллион донадан зиёд кир ювиш машинаси, 1 миллионта ошхона плитаси, яна шунча маиший совуткич, 75 минг дона савдо совуткичлари ва музлаткичлар, 700 мингта электр сув иситгич, 550 мингта сув насоси, 80 минг дона саноат кондиционери, 2 мингта лифт ва эскалаторлар, шунингдек, алюмин ва биметалл радиаторлар, эшик-ром фурнитуралари, сэндвич-панеллар, линолеум ва бошқа маҳсулотлар ишлаб чиқариш мўлжалланган. Тўққиз мингга яқин иш ўрни яратиш, йилига қарийб 185 миллион долларлик экспорт қилиш кўзда тутилган. 

Президент корхоналар барқарор ишлаши учун доимий харидор кераклигини, чет эллардаги заводлар билан келишиб, уларга зарур маҳсулот ва эҳтиёт қисмларни тайёрлаб бериш мумкинлигини таъкидлади. Яна янги лойиҳалар ишлаб чиқиш, уларни аҳолининг ишга талаби ва мавжуд ресурслардан келиб чиқиб, оқилона жойлаштириш бўйича топшириқлар берди.

Шу ерда Тошкент шаҳри туманларига тўғридан-тўғри хорижий инвестицияларни жалб қилиш ва ҳудудий экспорт ҳажмини оширишга қаратилган лойиҳалар ҳақида ҳам маълумот берилди.

Ўхшаш янгиликлар

Белгиланган матнни тинглаш учун қуйидаги тугмани босинг Powered by GSpeech