24 Июль 2019

00:00:00 (GMT+5)

Тошкент +30,5 °C

Кейинги авлод
19 Апр  2019 1271

141-мактабда содир бўлган воқеа бўйича Халқ таълими вазирлиги изоҳи

Шайхонтоҳур туманидаги 141-умумий ўрта таълим мактабида ўқитувчи ва ўқувчи ўртасида чиққан низо бўйича Халқ таълими вазирлиги қуйидагиларни маълум қилади:

Оммавий ахборот воситалари ва ижтимоий тармоқларда Шайхонтоҳур туманидаги 141-умумий ўрта таълим мактаби ўқитувчиси Б.Мирзаева ўқувчисига нисбатан қўпол хатти-ҳаракатлар содир этганлиги ҳақидаги видеолавҳа эълон қилинди.

Мазкур ҳолат ўрганилганда, 9-синф ўқувчиси И.Б. дарс жараёнига халақит бергани маълум бўлди. Ўқитувчининг танбеҳига қарамай, у баланд овозда гапириб, дарсга халақит берган.

Ўқувчининг қўли кикбокс спорт тўгарагида лат егани сабабли гипсда бўлган. Ўқитувчи ўқувчига “Ўнг қўл билан ёзсанг бўлади-ку”, деганида, бола педагогни ҳақорат қилган. Бу гапларни кўтара олмаган ўқитувчи ўқувчини бир неча бор туртган, лекин урмаган.

Мазкур жараённи бошқа видеолавҳалар ҳам тасдиқлайди.

Ушбу жараённи шу синф ўқувчиси Р.М. уяли телефонига тасвирга олиб, синфдоши С.К. ва М.А.га Telegram мессенжери орқали юборган.

2018 йилнинг 13 январида ўқувчи Б.И. мактабнинг ички тартиб қоидаларига риоя қилмаганлиги, тенгдошлари билан ўзаро келишмовчилиги ҳамда педагог ходимларга нисбатан қўпол муносабати сабабли таълим муассасаси ички рўйхатига олинган. Мактаб маъмурияти, синф раҳбари, психолог ҳамда профилактика нозири томонидан тушунтириш ҳамда профилактик ишлар олиб борилганлиги натижасида ўқувчи ижобий томонга ўзгарган. 2018 йил 17 майда мактабнинг ички назоратидан чиқарилган.

Жорий йилнинг 18 апрель куни 141-умумий ўрта таълим мактабида жамоатчилик иштирокида Вояга етмаганлар ишлари бўйича Шайхонтоҳур тумани идоралараро комиссияси сайёр мажлиси ўтказилди ва мазкур иш кўриб чиқилди.

Комиссия қарорига кўра, Б.И. ва Р.М. ота-оналари Ўзбекистон Республикасининг Маъмурий жавобгарлик тўғрисидаги кодексининг 47-моддасига асосан жаримага тортилди.

Мазкур моддага кўра, ота-оналар ёки уларнинг ўрнини босувчи шахслар томонидан вояга етмаган болаларни тарбиялаш ва уларга таълим бериш борасидаги мажбуриятларни бажармаслик, шу жумладан вояга етмаган болаларнинг маъмурий ҳуқуқбузарлик содир этишига олиб келиши — энг кам иш ҳақининг иккидан бир қисмидан уч бараваригача миқдорда жарима солишга сабаб бўлади.

Ўқитувчи Б.Мирзаева мазкур вазиятдан сўнг ишдан бўшаш ҳақида ариза ёзган. Аммо синфнинг бошқа ўқувчилари ўқитувчи ҳақида ижобий фикр билдирганлар ва Б.Мирзаеванинг аризаси инобатга олинмаган. Ўқитувчи ушбу мактабда ўз фаолиятини давом эттиради.

Ўхшаш янгиликлар

Белгиланган матнни тинглаш учун қуйидаги тугмани босинг Powered by GSpeech