O‘zbekistonda investitsiya muhitini takomillashtirishga doir chora-tadbirlar ko‘rilmoqda

Joriy yilning 8-noyabr kuni poytaxtimizda investitsion muhitni yaxshilash, erishilgan natijalarni o‘rganish va ustuvor yo‘nalishlarni belgilab olishga bag‘ishlangan xalqaro davra suhbati bo‘lib o‘tdi.

Investitsion jarayon ishtirokchilarini birlashtirgan mazkur tadbir, davlat va xalqaro tashkilot mutaxassislari, shuningdek, eng yirik xorijiy va mahalliy korxona vakillari o‘rtasida mamlakatimizdagi investorlarning manfaatlarini ko‘zlovchi dolzarb masalalarni muhokama qilish uchun ochiq maydonchaga aylandi. Forum O‘zbekiston Respublikasi Oliy Majlisi Senati, Investitsiyalar bo‘yicha davlat qo‘mitasi, BMT Taraqqiyot Dasturining “O‘zbekiston Respublikasida investitsion muhitni yaxshilash” loyihasi va YTTBning O‘zbekistondagi vakolatxonasi bilan hamkorlikda Xalqaro Press Klub axborot ko‘magida tashkil etildi. Davra suhbati ishtirokchilarining ta’kidlashicha, investitsion salohiyatning o‘sishiga to‘sqinlik qiluvchi asosiy omillar sohaga oid milliy qonunchilikning takomillashmagani, xususan, qonunchilik me’yorlarininginvestitsiya sohalari bo‘ylab tarqalishiga salbiy ta’sir ko‘rsatadi. 

Investitsiyalar bo‘yicha davlat qo‘mitasi tomonidan Oliy Majlis Senati va BMT Taraqqiyot Dasturining ekspertlari ko‘magida Investitsiya Kodeksini ishlab chiqishda ish olib boradigan idoralararo ishchi guruhi tuzildi.

Tadbir doirasidagi muhokamalar davomida hukumat vakillari, tadbirkorlar, yetakchi ekspertlar mazkur Kodeksning konsepsiyasini muhokama qilish imkoniyatiga ega bo‘ldilar. Ularning ta’kidlashicha, ushbu hujjat yuqorida keltirilgan muammolarni hal qilish yo‘llarini aniqlashda, sarmoyaviy salohiyatning oshishida, mamlakatda ishbilarmonlik muhitini yanada yaxshilashga qaratilgan qonunlar ishlab chiqilishida hamda kafolatlangan qo‘shimcha imkoniyatlar yaratilishida alohida ahamiyatga ega. Hozirgi vaqtda Investitsiya kodeksining loyihasi www.regulation.gov.uz. portalida jamoatchilik muhokamasiga taqdim etilganligi qayd etildi.

Shuningdek, davra suhbati davomida Jahon banki, YTTB, yirik konsalting kompaniyalari bo‘lgan Ernst & Young va KPMG kabi xalqaro tuzilmalar spikerlari o‘z nutqlarida valyuta siyosatini liberallashtirish va milliy qonunchilikni takomillashtirish bo‘yicha qabul qilingan chora-tadbirlarni yuqori baholadilar, o‘z tajribalari bilan o‘rtoqlashish barobarida iqtisodiy islohotlarga oid tavsiyalar ham berishdi.

Tadbir ishtirokchilari bu kabi forumlar  jahon amaliyotida o‘z tasdig‘ini topgan eng samarali vositalardan biri bo‘lishini ta’kidladilar.

Davlat sektori, xalqaro tashkilotlar, xorijiy va milliy xususiy kompaniya vakillarining muhokamalarda ishtirok etishi investitsion jarayon qatnashchilarining tajribalarini birlashtirish imkonini berdi va ular asnosida davra suhbati yakunida tegishli tavsiyalar ishlab chiqildi.