15 Noyabr 2019

00:00:00 (GMT+5)

Toshkent +10,2 °C

Madaniyat
14 Oktyabr  2019 558

Ozoda Nursaidova yana sahnaga qaytadi

10-oktabr kuni xonanda Ozoda Nursaidova “O‘zbekkonsert” davlat muassasasiga o‘z ijodini keng targ‘ib qilish va faoliyatini qonuniy tarzda yuritish maqsadida konsert-tomosha faoliyatiga ruxsat beruvchi litsenziya so‘rab murojaat qildi, deb xabar qiladi “O‘zbekkonsert” matbuot xizmati.

Shu munosabat bilan 2019-yil 13-oktabr kuni “O‘zbekkonsert” davlat muassasasida ustoz san'atkorlar ishtirokida ochiq muloqot tarzidagi davra suhbati tashkil etilib, unda xonanda Ozoda Nursaidovaning murojaati muhokama etildi. 

Davra suhbatida xonandaning bundan bir necha yillar oldin siyosiy xatoga yo‘l qo‘ygani, bilib-bilmay, asoslanmagan ma'lumotlarga ishonib inson shaxsiyatiga teguvchi noo‘rin fikrlar bildirgani, bundan tashqari muxlislarga nisbatan hurmatsizlik qilgani, san'atkor odobi doirasidan chetga chiquvchi harakatlar sodir etgani ustozlar tomonidan qattiq tanqid qilindi.

Shundan keyin xonanda Ozoda Nursaidovaning o‘zi ham so‘zga chiqib, xatolarini tan olib, bundan bir necha yillar oldin bilib-bilmay, asoslanmagan ma'lumotlarga ishonib, hissiyotlarga berilib, jamoatchilik orasida o‘zining noo‘rin fikrlarini ommaviy axborot vositalari orqali bayon etganidan astoydil pushaymon ekanligini bildirib, shuncha vaqt ichida o‘ziga to‘g‘ri xulosa chiqargani, imkoniyat berilsa, bundan keyingi faoliyatida milliy estradani rivojlantirishga, o‘zining qo‘shiqlari bilan xalqqa xizmat qilishga va'da berdi. So‘ng, muhtaram Prezidentimiz va xalqimizdan hamda barcha san'atkorlardan uzr so‘rab, uni kechirishlarini, yana bir bor unga imkoniyat berishlarini iltimos qilgan. 

Davra suhbati yakunida barcha ustoz san'atkorlarning fikrlari tinglanganidan so‘ng, “O‘zbekkonsert” davlat muassasasi direktori Odiljon Abduqahorov tomonidan O‘zbekiston Respublikasi Prezidentining san'at ahliga bo‘lgan g‘amxo‘rligi va mehribonligi hamda kechirimliligi bois garchi xonanda Ozoda Nursaidova tomonidan o‘z vaqtida noo‘rin fikrlar bildirilganiga qaramasdan, Yurtboshimiz tomonidan bugun uning kechirilgani hamda erkin ijod qilishiga imkoniyat yaratilgani ma'lum qilindi.

O‘xshash yangiliklar

Belgilangan matnni tinglash uchun quyidagi tugmani bosing Powered by GSpeech