26 Avgust 2019

00:00:00 (GMT+5)

Toshkent +24,6 °C

Hukumat
9 May  2019 1256
O‘zbekiston Respublikasi Prezidentining matbuot xizmati

Ajdodlar jasorati – mardlik maktabi, g‘urur-iftixor manbai

Toshkent botanika bog‘ida Xotira va Qadrlash kuniga bag‘ishlangan bayram tadbiri bo‘lib o‘tdi. 

Unda O‘zbekiston Respublikasi Prezidenti Shavkat Mirziyoyev ishtirok etdi. 

Davlatimiz rahbari bayram tadbiriga kelgan urush va mehnat faxriylarining har biri bilan alohida salomlashib, hol-ahvol so‘radi. Ularga sihat-salomatlik, uzoq umr tiladi. Nuroniylar yurtimizga tinchlik-osoyishtalik, xalqimizga farovonlik tilab duolar qildi. 

Bog‘da Ikkinchi jahon urushi vaqtidagi kompozitsiyalar installyasiyasi aks ettirilgan. Poezd va harbiy texnikalar namoyish qilingan.

Ramziy sahnada mashhur o‘zbek generali Sobir Rahimov qo‘mondonligidagi diviziyaning qahramonligi aks ettirildi. Prezident faxriylar bilan birga uni tomosha qildi.

Insoniyat tarixidagi eng dahshatli bu urushda O‘zbekistondan 1 yarim milliondan ortiq odam qatnashgan. Butun xalqimiz tinimsiz mehnat qilib, jang maydonlariga harbiy texnika va qurol-yaroq, kiyim-kechak, oziq-ovqat yetkazib turgan. Urush hududlaridan ko‘chirib keltirilgan 1 millionga yaqin insonga boshpana berib, o‘z rizqini baham ko‘rgan. 

Xalqimizning fashizm ustidan g‘alaba qozonishga qo‘shgan ulkan hissasi, bag‘rikengligi va mehribonligi hech qachon unutilmaydi.

Bayram tadbirida mamlakatimizning barcha hududlaridan kelgan urush va mehnat faxriylari ishtirok etdi.

Prezident Shavkat Mirziyoyev Xotira va Qadrlash kuni hamda G‘alabaning 74 yilligi bilan barcha faxriylarni, butun xalqimizni tabrikladi. 

– Ming-minglab jasur ota-bobolarimiz dunyodagi ko‘plab xalqlar qatorida bu mudhish urushda chinakam qahramonlik ko‘rsatdilar. Bu so‘nmas jasorat, mana, 74 yildirki, biz uchun mardlik maktabi, g‘urur-iftixor manbai bo‘lib kelmoqda va bundan keyin ham shunday bo‘lib qoladi, – dedi Shavkat Mirziyoyev.

Keksalarga, mo‘tabar faxriylarga yuksak e’tibor va g‘amxo‘rlik ko‘rsatish davlatimiz siyosatining ustuvor yo‘nalishi ekani ta’kidlandi.

– Bugungi ozod va erkin hayot uchun, farzandlarimizning baxti va kamoli uchun biz ularning oldida cheksiz qarzdormiz. Bu aziz insonlarni asrab-avaylash, ularning sog‘-salomat va mazmunli umr kechirishlari uchun barcha sharoitlarni yaratib berish – hammamizning muqaddas insoniy burchimizdir, – dedi Prezident.

Davlatimiz rahbarining 2019-yil 23-apreldagi «Xotira va Qadrlash kuniga tayyorgarlik ko‘rish va uni o‘tkazish chora-tadbirlari to‘g‘risida»gi qarorida bu e’tibor yana bir bor o‘z ifodasini topdi. Qarorga muvofiq, Ikkinchi jahon urushi qatnashchilari va front ortida mehnat qilgan faxriylarga, xizmat burchini bajarish chog‘ida halok bo‘lgan harbiy xizmatchilar va huquqni muhofaza qilish organlari xodimlarining oila a’zolariga moddiy va ma’naviy yordam ko‘rsatildi. «Ajdodlarni xotirlash – muqaddas qadriyat», «E’tibor va g‘amxo‘rlik – insoniy burch» shiorlari ostida madaniy-ma’rifiy tadbirlar o‘tkazildi. Bu ishlar izchil davom ettirilmoqda.

Bayram tadbirida O‘zbekiston Qurolli Kuchlari Markaziy ashula va raqs ansambli, folklor jamoalar, estrada xonandalari ijrosida kuy-qo‘shiqlar yangradi. 

Bunday tadbirlar mamlakatimizning barcha hududlarida bo‘lib o‘tmoqda.

O‘xshash yangiliklar

Belgilangan matnni tinglash uchun quyidagi tugmani bosing Powered by GSpeech